تعليم logic and problem solving skills و coding للأطفال (الجزء الأول)

مقدمة

أغلب الدول المتقدمة دلوقتي بتحرص علي تعليم الأطفال لمبادئ البرمجة و علوم الحاسب من الصغر لأهمية المجال ده في حياتنا دلوقتي ده غير أنه مهم جدا للطفل لأنه بيغير من طريقة تفكيره تماما في كل المواقف والمشاكل اللي بتواجه وبناءا عليه قررت اني ادرس واتعلم ازاي نعلم الأطفال مهارة التفكير وحل المشاكل و البرمجة و هنزل كل اللي عرفته في السلسلة دي واللي هتبقي متكونة من اجزاء كل جزء بيتكلم عن فئة عمرية بالتفصيل من أول الاطفال تحت ال١٢ شهر الي ما بعد ١٠ سنوات بحيث نبقي نرجعلها في المستقبل ونطبقها عليأطفالنا بإذن الله.

في أول ٥ سنين من عمر الطفل بيتعلم ازاي يفكر وكيفية حل المشاكل ودي بتكون مقدمة لتعلم البرمجة والكود بعد كدة.

مرحلة الرضع والأطفال تحت ال١٢ شهر

الأطفال في اول ٣ شهور بيتعلموا من البيئة المحيطة بهم عن طريقة حاسة السمع و حاسة البصر وعشان كدة تركيزنا كله في الفترة دي ان الطفل يسمع ويشوف حاجات مختلفة دايما ممكن مثلا نستخدمه الالعاب المعلقة في السرير ودي بتساعده علي تقوية البصر عنده وبتشجعه علي ملاحظة شكل وصوت الالعاب وهي بتتحرك وكمان لو فيها صوت موسيقي بتساعده علي الهدوء و السكينة.

في خلال الشهر التالت بيبدأ الطفل التمييز بين الالعاب عن طريق السمع والبصر واللمس ولذلك هيبدأ يمسك الالعاب ويحاول يمسكها ومن الالعاب اللي هتجذب انتباهه في الفترة دي الشخاشيخ الملونة والالعاب اللي بتطلع صوت وفي السن ده طبيعي جدا ان الطفل يحط الالعاب في بوقه لان دي وسيلة بالنسباله لمعرفة الأشياء فلازم نحرص علي اننا نختار العاب مفيهاش اجزاء ممكن تتبلع ولازم نحرص علي نضافتها دايما .

من سن ٧ شهور لحد ١٢ شهر الطفل بيبدأ يتذكر الحاجات البسيطة والتعرف عليها زي مثلا الأشخاص القريبين منه و اجزاء جسمه وعشان كدة في المرحلة دي نركز علي الالعاب اللي بتتحرك وتكون متنوعة في الشكل واللون عشان يعرف يفرق بين الالوان والاشكال المختلفة ونخليه يلعب بالمكعبات اللي ليها دور كبير جدا في تنمية مهارة حل المشاكل عن الطفل ونجبله كتب مصنوعة من القماش او البلاستيك ويكون في رسومات وشوش واضحة.

الألعاب المناسبة للمرحلة دي

الالعاب الموسيقية

هتساعده في تطور تفكير ودماغه ولأن الصوت هو أبرز الحاجات اللي بتلف انتباه الطفل في المرحلة دي

المكعبات

زي ما عرفنا ان المكعبات من اهم الالعاب اللي بتنمي مهارة حل المشكلات عند الطفل عن طريق انه يحاول يبنيهم فوق بعد و يهدهم ويفضل تكون عليها حروف او أرقام عشان يحاول يرتبهم بعد كدة

العاب تركيب الشكل مع الفراغ

ودي من أكتر العاب التحدي للأطفال بعد ال٩ شهور وهتنمي تفكيره وذكاءه

دمية

الدمي والدباديب هتخليه يلعب معاها وهتساعده في انه يتعلم ازاي يتواصل ويلعب مع الافطال اللي في سنه بعد كدة و هتسليه في الوقت اللي هتكون مش مركز معاه وانتوا خارجين مثلا

الألعاب المتحركة

زي العربيات ويفضل تبقي بصوت والالعاب دي هتساعده علي الحركة وممكن تلعب بيها معاه عن طريق انك تشغل صوتها وتخبيها جنبه او تحت البطانية مثلا وتخليه يدور عليها (انه يعتمد علي نفسه في انه يلاقي الحاجة اللي مش شايفها عن طريق السمع) وده هيزود

الكورة

هتخليه انه يحدفها ويمشي وراها وبتالي هتقوي عضلاته وبردو هتساعده علي التفكير

الأنشطة اللي تعملها معاه يوميا

دي امثلة لبعض الأنشطة اللي تعملها معاه يوميا كل نشاط من دول لمدة ١٠ دقايق

١-حطه قدام مراية وخليه يبص علي نفسه وأثناء ذلك كلمه عن نفسه (بص شوف أحمد بيضحك ازاي , شوف احمد شعر متسرح , شوف ده بوق أحمد .... الخ )

٢- ابعده عنه حاجة ماسكها او بيلعب بيها وخليه يحاول يوصلها ويمسكها بنفسه

٣- اعمل جبل من المخدات (بكذا مخدة صغيره) وخليه يحاول يتسلقها ويسنده عليها ده هيساعده انه يفكر ازاي يوصل للقمة

٤- عرفه جسمه عن طريق ان تسأله وتشاورله علي الحاجة اللي بتسأل عليها (فين بوقك فين ايدك فين عينك(

٥-كلمه وانت ماشي في البيت او الشارع وعرفه ايه الحاجات اللي حوليه وانت بتشاورله عليها (شوف دي فازة , دي عصفورة , دي شجرة (

٦- القراءة له ودي شايفها من اهم الحاجات لانها هتنمي طريقة تفكيره وهتزود التواصل ما بينكم وهلخص القراءة في نقط بسيطة

تحديد معاد ثابت للقراءة في جو هادي
حاول لما تنوي تبدأ تقوله بصيغة السؤال يلا نبدأ قصة كذا ؟ عشان تلفت انتباهه
عود الطفل علي سماع جمل معينة عند بداية ونهاية القصة (كان ياما كان كان في كذا - توتة توتة خلصت الحدوتة) عشان يفهم بعد كدة ان القصة هتبدأ او خلصت
تغير نبرة الصوت حسب الاحداث عشان ميزهقش
القصص تكون فيها رسومات و وشوش واضحة لأن الاطفال في الوقت ده بيحبوا يتفرجوا علي الوشوش وتعبيراتها

وبكدة أكون خلصت أول جزء وبإذن الله الجزء التاني هيتكلم عن الأطفال من سن ١٢ شهر ل ١٧ شهر